கடல்

கருமியின் கைப்பணமாய்ப்

பருக பயன்படாத

திரவ விரயம் .

*

அலைபுகை வெளியிடும்

அசைவ உணவு

தொழிற்சாலை .

*

சந்ததியைப் பறிகொடுத்த

கடல் மீன்களின்

கண்ணீர் தேசம்.

*

"முதலை " இழந்தாலும்

முழ்கிபோகாத

இயற்கை வங்கி .

*

(எனது நிழல் மடி புத்தகத்திலிருந்து )

தண்ணீர்

உலகின் திரவ உயிர்மூச்சு ! நாளை

கலகம் பிறந்துசுடு காடாய் - உலகழிய

நீரே கரணியமாய் நிற்குமெனில் ஈரமன

நீரே"தீ" யாகும் நிகழ்வு.

எலிச் சொடுக்கலில் ...

மூடிய வலக்கையின்

எலிச் சொடுக்கலில்

உயிர்க்கிறாய் வண்ணமயமாய் !

@

எத்தனை செலவு செய்தாலும்

எட்டமுடியாத தூரங்களையும்

பார்வைக்குப்

பந்தி வைக்கிறாய் .

@

தொலைதேச மைதானத்தில்

உதைப்படும் பந்துகளையும்

கைதொடும் தூரத்தில்

காட்டி மிரட்டுகிறாய் !

@

பிசிராந்தையார் காலநட்பை

முகம் பார்த்து

முன் மொழியவும்

இன கவர்ச்சி காட்டி

வழிமொழியவும் கூட

வலைவிரிக்கிறாய்.

@

திரைத்துறை ஜாம்பவான்கள்

எத்தனை போராடினாலும்

ஓசையில்லாமல்

புதிய படங்களைக் கூட

திரை இறக்கம்

செய்து தருகிறாய் !

@

அறைக்குள் திரைவிரிக்கும்

வண்ணக் கணினியே

உன்னை எண்ணி

பரவசத்தை விடவும்

பரிதாபமே மேலிடுகிறது ...

அடுத்து வருகிற எந்த

அறிவியல் கண்டுபிடிப்பு உன்னை

எடுத்தெரியப் போகிறதோ என்ற

இரக்கத்தால் !

பொரு"ளாதாரம்"

உணர்ச்சிப் பெருக்கால்

கொந்தளித்துவிட்டார் -பாரத

உள்துறை அமைச்சர் !

*

அமெரிக்க அரசிடம்

புகார் செய்யப் போவதாகவும்

அறிவித்திருக்கிறார் ...

*

இத்தனை பெரிய பதவிலிருப்பவரை

இரத்தம் கொதிக்கவைத்த அந்த

ஆத்திர சம்பவம் எது ?
*

படிக்கவும் பிழைக்கவும் போன

பலப்பல தேசங்களில்

உதைபடுகிற இந்தியர்கள் பற்றிய

உணர்ச்சிக் கொந்தளிப்பா ?

*

எரிவாயுவும் எண்ணெய்விலையும்

ஏறி ஏறியே இந்திய மக்களை

நசுக்குகிறதே என்ற வேதனைக்கு

உலகளாவிய தீர்வு காணும்

உந்துதலா ?
*

முள்வேலிக் கமிபிக்கிடையே

முடங்கிக் கிடக்கிற

மூன்று லச்சம் தமிழர்களின்

எதிர்காலம் பற்றிய

எழுந்த ஆத்திரமா ?

*

பொறுங்கள் இந்திய நாட்டுப்

பொதுமக்களே ...பொறுங்கள் ...

*

உலகின் மிகப் பெரிய

ஜனநாயக நாட்டின்

உள்துறை அமைச்சரை

உணர்ச்சி வசப்பட வைத்த

சம்பவம் எது தெரியுமா ?

*

அமெரிக்க விமான நிலைய

அதிகாரிகள்

சோதனை என்ற பெயரில்

இரண்டு மணி நேரம்

காத்திருக்க வைத்துவிட்டார்களாம்

நடிகர் ஷாருக்கானை ...
*

அமெரிக்க அரசிடம்

புகார் செய்ய

அமைச்சருக்குதான் எத்தனை

அவசியமான பிரச்சனை என்று

எண்ணி எண்ணியே

இறுமாந்து போகின்றன

இந்திய இதயங்கள் ...
*

பாரத மாதா கீ ஜே!

பாலிவுட் பிதாவுக்கு ... ம்ம்..ஜே !!

புலமைப் புதிர்

முன்னிரண்டின் கையில் முடிவிரண்டும் நாசந்தான்

பின்னிரண்டும் பாவாகும்! பேசாத - அன்னமே

ஊரறிந்த தில்லை; உயர்ந்தோரே கூடுமது

நேரத்தைச் சுட்டும் நிகழ்வு !

நூல் வெளியீட்டு விழா!

ஆர்ப்பாட்டமான

அழைப்பிதழ் ...

வரவேற்புரை ...

வாழ்த்துரை ...

அணிந்துரை ...

ஆய்வுரை ...

ஏற்புரை என்று

எந்தவிதமான

சம்பிரதாயச்

சடங்குகளுமின்றி

நடந்து முடிந்தது

நூல் வெளியீட்டு விழா ...

*

செழுமையாக

விம்மி வெடித்தது

செடியில் பருத்தி .

யாப்பியல்

அப்பாவை அப்பாவை அப்பாவைப் பாவகையுள்

எப்பா வகையென்றே ஈர்வதென்றாள் _ அப்பாவும்

யாப்பியல் கற்றிடுநீ; யாண்டும் கவியியலில்

மூப்பாயென் றாரே முனைந்து.

பண்பாடு

உலகமயமாதலின்

உச்சத்தில்

சுருங்கிப் போயின

உலகமும் உடைகளும்

*

உடைகளின் கண்ணியம்

உடைக்கப்பட்டதால்

எதிர்காலத்தில் வருமோ

20 கிராம் தங்கமும்

25 கிராம் மேலாடையும்

எடுக்கும் சூழல் ?

விதி

சாலை விதிகளை

காலால் மிதித்தபடி

சிவப்பு விளக்கு

விழுந்தபின் ஓடினான்

ஓடும்போதே விழுந்தான்

ஆயிரம் மைல்களுக்கும் அப்பால்

அறுந்து விழுந்தது -எனக்கு

அறிமுகம் இல்லாத

ஒரு தங்கையின் தாலி !

*

மீறியது சாலை விதி !

மாறியது தலை விதி !!