தடங்கல்கள்...அவை
தடைகளல்ல ,
பயணப்படிக்கட்டுக்களில்
பாதங்களை உள்வாங்கும்
பள்ளங்களிலிருந்து -தன்
உள்ளங்கைகளால்
உயர்த்திப்பிடிக்கும்
உதவும் கரங்கள்.
சோர்வும் துயரமும்
சேர்ந்தழுத்தும்போது
தோழமை ரத்தங்களே
தூரமாகிப் போனாலும்
தடங்கல்கள்தான்
குதிரையின் குளம்பொலியோடு
போட்டியிட்டு
பாயப் பழக்குகிறது மனதை
தொடரும் தோல்விகளால்
ரத்தத்திலும் மனதிலும்
அழுத்தம் அதிகமாகும் போது
தடங்கல்கள்
நம்முள் உறங்கும்
போராட்டக் குணத்தை
உயிர்த்தெழச் செய்து
உற்சாகக் குளியலில்
நித்தமும் நம்மை
நீராட்டுகிறது !
நடுவிரலின் வளர்ச்சிகண்டு
பொறாமையில் பொசுங்கும்
கட்டை விரலின்
கவலை போல
யதார்த்த வளர்ச்சியைக்கூட
கண்டு பொறுக்காத சில
செயற்கைத் தடங்கல்கள்
கால ஓட்டத்தில்
காணாமற் போகும் ... எனவே
தடங்கல்களை
வாழ்க்கையின் வாசலில் நின்று
வரவேற்போம் ...
போர்க்குண நெருப்பில்
புடம் போடப்பட்ட நம்
வாழ்வின் அடையாளங்களை
வருங்காலத் தலைமுறைக்குப்
படம்போட்டுக் காட்டுவன
இந்த
தடங்கல்களின்
தடங்கள்கள்தான்!.
